真濟人咧買衫仔褲的時，會要求愛上天然的產品，便若有一屑屑仔化學的成份就無愛。毋過，天然的敢一定上好？若是徛佇服裝產業的角度來看，有人會要求愛百分之百用棉仔做的純棉產品才欲買。棉仔按佗位來？若講著欲種棉仔，種作的過程需要大量的殺草劑、農藥、肥、水資源……等等，對土地、環境的負擔不止仔大。 「有機棉」聽起來敢若是一个袂䆀的選項？伊對土地的傷害雖然有較低，但是「零化學」的要求對種作的人、對𪜶的收成是足大的考驗，𪜶有可能是下一牛車的本才收一畚箕的量。生理人將本求利，成本愈低愈好，願意出懸價買有機棉的廠商無濟。 咱的科技遐進步，敢無一兼二顧、摸蜊仔兼洗褲的方法？當然嘛有！咱會用得考慮「天絲纖維」，伊是按天然的木漿內底用專利的奈米原纖技術提煉出來的。用著的水較少，對土地的利用會當閣較有效率。透過科技的輔助，予經濟的發展和生態的平衡會當兩全其美，永續經營。