題組3: 請根據下背个文章內容選出最適合个答案 燒火炭个事場，通棚在山項，炭窯就結在樹園个中央或之邊脣。在挖樹仔開始，一直到封灶門，大家就在該隻事場做事，故所燒火炭个人輒常愛跍在炭窯寮下，一頭二月仔無轉屋係極平常个事情。 燒火炭對頭下碼打炭窯，入窯到封灶空門，係異重要个過程，逐隻細節就愛特別細義，做毋得堵搞樣仔，燒火炭个人，儕儕就相信，做這種頭路，愛專心，還愛有神心，做麼个都愛淨俐，正有好順順利利毋會出差錯，燒出來个炭仔正會靚。故所，做頭家个人，在打炭窯啟工，入窯起火，封灶空門該下就愛辦牲儀拜伯公，順續仔慰勞一下工人个苦勞。 窯門封忒停火，大約愛等兩禮拜，正做得開窯門出火炭。火炭擎出窯門會有三種，樹頭部分燒出來个安做炭頭；大枝个樹桱燒出來个係盡上等个火炭，安做響炭，價錢盡好；樹桱尾截較細枝个，有兜吂完全炭化，安做「馬腳」，價錢較差。到窯肚个火炭出盡，地泥下留下來歸坪仔个炭末仔，乜做得掃起來起火、烳茶、燉菜。火炭出出窯，敲到一截一截大約兩尺半長，一枝一枝仔打竳張在炭籠仔項，分級張籠，分級出貨。一窯上等个火炭，為頭家帶來盡好个利存，就像一籠一籠个烏金樣仔。毋過，該兜出火炭个工人，出完一窯火炭，逐個就變到伸兩粒目珠走出來个烏人，洗一個身愛用忒半垤茶箍正洗得淨。 （本文出自《阿啾箭个故鄉》）